ગાંધીનગર: રાજ્ય સરકાર દ્વારા ભ્રષ્ટાચાર અને ગંભીર ગેરરીતિઓના આક્ષેપોનો સામનો કરી રહેલા ઉચ્ચ અધિકારીઓ સામે કડક કાર્યવાહી કરવામાં આવી છે. રાજ્યના ઇતિહાસમાં પ્રથમ વખત એક જ દિવસમાં બે વિવાદિત IAS અધિકારીઓ કે. રાજેશ અને ગૌરવ દહિયાને તાત્કાલિક અસરથી ફરજિયાત નિવૃત્તિ (કમ્પલસરી રિટાયરમેન્ટ) આપવામાં આવી છે. આ ઉપરાંત, જમીન સંપાદનમાં ગેરરીતિના મામલે સબ-રજિસ્ટ્રાર આર.સી. રબારીને પણ તાત્કાલિક અસરથી સસ્પેન્ડ કરવામાં આવ્યા છે. સરકારી આંકડા અને કેસ ડાયરીની ઝીણવટભરી સમીક્ષા બાદ લેવાયેલા આ નિર્ણયથી વહીવટી આલમ અને સચિવાલયમાં ખળભળાટ મચી ગયો છે.
ગૌરવ દહિયા અને કે. રાજેશની કારકિર્દીનો અંત
અધિક વિકાસ કમિશનર તરીકે ફરજ બજાવી ચૂકેલા ગૌરવ દહિયા નેશનલ હેલ્થ મિશનમાં હતા ત્યારે તેમની સામે નાણાકીય અનિયમિતતાઓ અને અંગત વર્તણૂકને લગતી ગંભીર ફરિયાદો ઉઠી હતી. લાંબા સમયથી વિવાદોમાં રહેલા દહિયા સામે આખરે સરકારે કડક વલણ અપનાવી તેમને ફરજિયાત નિવૃત્તિ આપી છે.
બીજી તરફ, સુરેન્દ્રનગરના કલેક્ટર તરીકેના કાર્યકાળ દરમિયાન કે. રાજેશ સામે સરકારી જમીન બિનખેતી કરવા અને ગેરકાયદેસર રીતે હથિયારના લાયસન્સ ઇશ્યૂ કરવા જેવા ગંભીર આરોપો લાગ્યા હતા. કેન્દ્રીય તપાસ એજન્સી (CBI) દ્વારા પણ તેમની સામે ગુનો નોંધી તપાસ ચલાવવામાં આવી રહી હતી. તેઓ છેલ્લા પાંચ વર્ષથી સસ્પેન્શન હેઠળ હતા.
બે IAS અધિકારીઓ સામે એક જ દિવસે લેવામાં આવેલી ફરજિયાત નિવૃત્તિની કાર્યવાહી વહીવટી તંત્રમાં ચર્ચાનો વિષય બની છે.
એક્સપ્રેસ હાઈવે જમીન સંપાદન મામલે સબ-રજિસ્ટ્રાર સસ્પેન્ડ
ભારતમાલા પ્રોજેક્ટ અંતર્ગત થરાદ-અમદાવાદ એક્સપ્રેસ હાઈવે માટે કરાયેલા જમીન સંપાદનમાં સરકારી તિજોરીને કરોડો રૂપિયાનું નુકસાન પહોંચાડવાના કથિત કૌભાંડનો મામલો સામે આવ્યો છે. હાઈવે માટે જમીન સંપાદિત થાય તે પહેલાં જ તેની કેટેગરી બદલીને ઊંચું વળતર મેળવવાની રમત સામે કાર્યવાહી કરવામાં આવી છે. આ મામલે અસલાલી ખાતે ફરજ બજાવતા સબ-રજિસ્ટ્રાર આર.સી. રબારીને તાત્કાલિક અસરથી સસ્પેન્ડ કરવામાં આવ્યા છે.
પ્રાથમિક તપાસમાં વર્ષ 2021થી 2025 દરમિયાન થયેલા આશરે 74 દસ્તાવેજો શંકાસ્પદ જણાયા છે. જમીન બિનખેતી ન હોવા છતાં દસ્તાવેજોમાં તેને 'બિનખેતી' દર્શાવવામાં આવી હોવાની બાબત સામે આવી છે. આ રીતે ભવિષ્યમાં સરકાર પાસેથી મોટા પ્રમાણમાં વળતર મેળવવાનો ખેલ રચાયો હોવાની આશંકા વ્યક્ત કરવામાં આવી છે.
74 દસ્તાવેજો તપાસના ઘેરામાં
વર્ષ 2021થી 2025 દરમિયાન થયેલા આશરે 74 દસ્તાવેજોમાં જમીનની કેટેગરી અને તેના આધારે મળનારા વળતર અંગેની ગેરરીતિની શંકા વ્યક્ત કરવામાં આવી છે.
મામલાની તપાસ આગળ વધતાં આગામી દિવસોમાં આ કથિત કૌભાંડમાં સંડોવાયેલા અન્ય વચેટિયાઓ અને અધિકારીઓ સામે પણ કાર્યવાહી થઈ શકે છે.
સરકારી તંત્રમાં ખળભળાટ
બે IAS અધિકારીઓને ફરજિયાત નિવૃત્તિ અને જમીન સંપાદન મામલે સબ-રજિસ્ટ્રાર સામેની કાર્યવાહીથી વહીવટી તંત્રમાં આ મુદ્દો ચર્ચામાં આવ્યો છે.
