સંબંધો સાચવવા ‘સ્માર્ટ’ બનવું જરૂરી, પ્રેમ સાથે સમજણ અને સમય પણ આપો

સુરત : આજના વ્યસ્ત જીવનમાં પારિવારિક અને સામાજિક સંબંધોને મજબૂત બનાવવા માટે માત્ર પ્રેમ પૂરતો નથી, પરંતુ સમય, સંવાદ અને પરસ્પર સમજણ પણ જરૂરી છે. આ હેતુથી ધી સધર્ન ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (SGCCI)ની લેડીઝ વિંગ દ્વારા 24 સપ્ટેમ્બરે સરસાણા સ્થિત સુરત ઇન્ટરનેશનલ એક્ઝિબિશન એન્ડ કન્વેન્શન સેન્ટરના SPB હોલમાં ‘How to have S.M.A.R.T. Relationships’ વિષય પર ઇન્ટરેક્ટિવ સેશન યોજાયું હતું. મનોચિકિત્સક, રિલેશનશિપ એક્સપર્ટ અને સોશિયલ આંત્રપ્રિન્યોર ડો. તૃપ્તિ ચૌધરી પટેલે મુખ્ય વક્તા તરીકે સંબંધોને વધુ સ્વસ્થ બનાવવા અંગે માર્ગદર્શન આપ્યું હતું.

સંબંધો આપોઆપ નથી ટકતા
ચેમ્બર પ્રમુખ અશોક જીરાવાલાએ જણાવ્યું કે સંબંધોને ટકાવી રાખવા પ્રેમ, સંવાદ અને એકબીજા માટે સમય આપવો જરૂરી છે. સાચા સંબંધમાં ક્યારેક પોતાની વાત છોડીને સામેની વ્યક્તિને સમજવામાં પણ જીત સમાયેલી હોય છે.

રોલ-પ્લે દ્વારા રોજિંદા જીવનની સ્થિતિઓ સમજાવાઈ

કાર્યક્રમ દરમિયાન ડો. તૃપ્તિ પટેલે પ્રેક્ટિકલ એક્ટિવિટી અને લાઈવ રોલ-પ્લે દ્વારા સંબંધોમાં ઊભી થતી સામાન્ય સમસ્યાઓને સરળ રીતે સમજાવી હતી. ઉપસ્થિત મહિલાઓએ સાસુ-વહુ, પતિ-પત્ની તથા માતા-પિતા અને બાળકો વચ્ચેના સંબંધોને લગતા વિવિધ પ્રસંગોનું રોલ-પ્લે રજૂ કર્યું હતું. તેના દ્વારા મતભેદ કેવી રીતે ઊભા થાય છે અને વાતચીત તથા સમજણથી તેને કેવી રીતે ઉકેલી શકાય તે સમજાવવામાં આવ્યું હતું.

સંબંધોમાં પોતાની વર્તણૂક ઓળખવી જરૂરી

ડો. તૃપ્તિ પટેલે જણાવ્યું હતું કે સંબંધોને સુધારવા માટે સૌપ્રથમ પોતાની વર્તણૂક અને વિચારોને સમજવા જરૂરી છે. ઘણી વખત વ્યક્તિ પોતાની જૂની માન્યતાઓ અને પૂર્વગ્રહોના આધારે વિચાર્યા વગર પ્રતિક્રિયા આપે છે. તેમણે સંબંધોમાં જોવા મળતી છ મુખ્ય વર્તણૂક પેટર્ન વિશે સમજાવ્યું હતું.

સંબંધોમાં જોવા મળતી 6 પેટર્ન
People Pleaser, Overthinker, Problem Solver, Controller, Avoider અને Reactor જેવી વર્તણૂક વ્યક્તિના સંબંધો પર અસર કરી શકે છે. પોતાની પેટર્ન ઓળખવી એ સંબંધોમાં સુધારાનું પ્રથમ પગલું છે.

મતભેદ ઉકેલવા ‘5 A’s’નો મંત્ર

સંબંધોમાં મતભેદ કે ઘર્ષણ થાય ત્યારે તેને વધુ ન વધારતા યોગ્ય રીતે ઉકેલવા માટે ડો. તૃપ્તિ પટેલે ‘5 A’s of Problem Solving’ સમજાવ્યા હતા. તેમાં Avoid, Assert, Alter, Adjust અને Acceptનો સમાવેશ થાય છે. બિનજરૂરી ચર્ચા ટાળવી, પોતાની લાગણી સ્પષ્ટ રીતે વ્યક્ત કરવી, જરૂરી હોય ત્યાં પોતાના વર્તનમાં સકારાત્મક ફેરફાર કરવો, પરસ્પર તાલમેલ સાધવો અને જે બાબતો બદલી ન શકાય તેનો સ્વીકાર કરવો જેવા મુદ્દાઓ સમજાવવામાં આવ્યા હતા.

તેમણે જણાવ્યું હતું કે પરિવાર ટીમવર્કની જેમ કાર્ય કરે છે. એકબીજાની ભૂલોને સમજવાની, જરૂર પડે ત્યારે નિઃસંકોચ ‘Sorry’ કહેવાની અને પરિવારના સભ્યોની સિદ્ધિઓની કદર કરવાની ભાવના સંબંધોને વધુ મજબૂત બનાવે છે.

‘5 A’s’થી મતભેદ ઉકેલવાનો પ્રયાસ
Avoid એટલે બિનજરૂરી કલેશ ટાળવો, Assert એટલે પોતાની વાત સ્પષ્ટ કરવી, Alter એટલે જરૂરી બદલાવ લાવવો, Adjust એટલે તાલમેલ સાધવો અને Accept એટલે સ્વીકાર કરવો.

બદલાતા સમય સાથે સંબંધોમાં પણ બદલાવ જરૂરી

લેડીઝ વિંગના ચેરપર્સન અલ્પાબેન મદ્રાસીએ જણાવ્યું હતું કે બદલાતા સમયની સાથે સંબંધોને માત્ર જાળવી રાખવા નહીં, પરંતુ તેમને વધુ સ્વસ્થ અને સમજણભર્યા બનાવવા પણ જરૂરી છે. પરસ્પર આદર, સંવાદ અને સમજણથી સંબંધોમાં મજબૂતી લાવી શકાય છે.

કાર્યક્રમમાં ચેમ્બરના તત્કાલીન પૂર્વ પ્રમુખ નિખિલ મદ્રાસી, માનદ્ મંત્રી પરેશ લાઠીયા, માનદ્ ખજાનચી અતુલ પટેલ, લેડીઝ વિંગના એડવાઇઝર રોમા પટેલ અને સચિવ દમયંતી વાણાવાલા સહિતના સભ્યો ઉપસ્થિત રહ્યા હતા. મુખ્ય વક્તાનો પરિચય સ્મિતાબેન જરીવાલાએ આપ્યો હતો, જ્યારે આભારવિધિ પારુલ પટેલે કરી હતી.