અમદાવાદ: વર્ષ 2022માં સુરત જિલ્લાના કોસંબામાં બનેલા ત્રણ હત્યાના કેસનો અમદાવાદ ક્રાઈમ બ્રાન્ચે ભેદ ઉકેલ્યો છે. તપાસમાં માધવદાસ ભક્તિરામ સાધુ અને તેની પત્ની ઉર્મિલા ઉર્ફે જયા માધવદાસ સાધુની કથિત સંડોવણી સામે આવી છે. પોલીસના જણાવ્યા મુજબ, શાંતાબેન ગંભીરભાઈ વસાવાની હત્યામાં પોતે સંડોવાયેલો હોવા છતાં માધવદાસે પોલીસને ખોટી માહિતી આપી પત્ની અને તેના કૌટુંબિક ભાઈને ફસાવવાનો પ્રયાસ કર્યો હતો.
ખોટી બાતમીથી ખુલ્યો ભેદ
માધવદાસે શાંતાબેનની હત્યા માટે પત્ની ઉર્મિલા અને તેના કૌટુંબિક ભાઈ સામે શંકા વ્યક્ત કરી હતી. જોકે તપાસમાં કૌટુંબિક ભાઈની સંડોવણીના પુરાવા ન મળતાં પોલીસનું ધ્યાન માધવદાસ તરફ ગયું હતું.
પૂછપરછમાં જવાબ બદલાતાં શંકા વધુ ઘેરી બની
બાતમીના આધારે પોલીસે ઉર્મિલાના કૌટુંબિક ભાઈની પૂછપરછ કરી હતી. જોકે તેની સામે હત્યામાં સંડોવણી દર્શાવતી કોઈ હકીકત સામે આવી નહોતી. ત્યારબાદ ક્રાઈમ બ્રાન્ચે માધવદાસની હિલચાલ અને તેની ભૂમિકા અંગે તપાસ શરૂ કરી હતી. પોલીસની નજર હેઠળ રાખ્યા બાદ તેની અલગ-અલગ મુદ્દે પૂછપરછ કરવામાં આવી હતી. દરમિયાન તેના જવાબોમાં વિસંગતતા જણાઈ હતી. વધુ પૂછપરછમાં માધવદાસે પત્ની ઉર્મિલા સાથે મળીને શાંતાબેનની હત્યા કરી હોવાની કબૂલાત કરી હોવાનો પોલીસનો દાવો છે.
દાદીની મિલકત પર નજર
તપાસ મુજબ શાંતાબેન પાસે રહેલી રોકડ રકમ, કિંમતી સામાન અને મકાન મેળવવાનો આશય પણ હત્યા પાછળ હોવાનું સામે આવ્યું છે.
મૃતદેહ છુપાવવા માટે બેરલનો ઉપયોગ કર્યો
પોલીસ તપાસ મુજબ શાંતાબેનની હત્યા બાદ મૃતદેહને બેરલમાં રાખવામાં આવ્યો હતો અને તેમાં સિમેન્ટ ભરવામાં આવ્યું હતું. બાદમાં મૃતદેહને બહાર કાઢી જમીનમાં ખાડો કરીને દાટી દેવામાં આવ્યો હોવાની માહિતી તપાસમાં સામે આવી છે.
આ કેસની તપાસ દરમિયાન વર્ષ 2022માં બનેલા અન્ય બે હત્યાના બનાવોની કડીઓ પણ મળી આવી હતી. ઉર્મિલાની બહેન ભગવતી કમલેશભાઈ વસાવા ટી.બી.ની બીમારીથી પીડાતી હતી. પોલીસના જણાવ્યા મુજબ, માધવદાસ અને ઉર્મિલાએ મળીને તેમના મોઢા પર ઓશીકું દબાવી હત્યા કરી હતી અને મૃતદેહ દફનાવ્યો હતો.
માતાની સંભાળમાંથી છૂટવા પણ હત્યા કર્યાનો દાવો
માધવદાસની માતા અને ઉર્મિલાની સાસુ મંજુલાબેન ભક્તિરામ સાધુ લકવાગ્રસ્ત હતાં. પોલીસ તપાસમાં તેમની રોજની સંભાળની જવાબદારીમાંથી છૂટવા માટે દંપતીએ તેમની પણ હત્યા કરી હોવાની કબૂલાત સામે આવી છે. મંજુલાબેનના મૃત્યુ બાદ તેમના અંતિમ સંસ્કાર કરવામાં આવ્યા હતા.
ત્રણ હત્યાની કડીઓ એક જ તપાસમાં જોડાઈ
શાંતાબેન, ભગવતી અને મંજુલાબેનના વર્ષ 2022ના અલગ-અલગ મૃત્યુની તપાસ આગળ વધતાં ત્રણેય કેસમાં માધવદાસ અને ઉર્મિલાની કથિત સંડોવણી સામે આવી છે.
પતિ-પત્ની વચ્ચે પણ અદાવત હોવાની માહિતી
તપાસમાં બંને વચ્ચેના સંબંધો અંગે પણ માહિતી સામે આવી છે. માધવદાસ અને ઉર્મિલા છેલ્લા આઠ મહિનાથી અલગ રહેતા હતા. ઉર્મિલા દાગીના, રોકડ રકમ અને પુત્રને પોતાની સાથે લઈ ગઈ હોવાને કારણે બંને વચ્ચે અદાવત હોવાનું પણ પોલીસ તપાસમાં બહાર આવ્યું છે.
આ રીતે પત્ની અને તેના કૌટુંબિક ભાઈને ફસાવવાના પ્રયાસથી શરૂ થયેલી તપાસ વર્ષ 2022ના ત્રણ હત્યાના કેસ સુધી પહોંચી હતી. અમદાવાદ ક્રાઈમ બ્રાન્ચે માધવદાસ અને ઉર્મિલાની ધરપકડ કરી છે. બંને સામે કાયદેસરની કાર્યવાહી હાથ ધરવામાં આવી છે અને સમગ્ર મામલે વધુ તપાસ ચાલી રહી છે.
