સુરત, તા.17: રાંદેર વિસ્તારમાં બેંકમાં ગીરો મૂકેલી મિલકતનું લોનનું દેવું વ્યાજ સહિત ચૂકવ્યા વિના બેંકની જાણ બહાર ખોટા દસ્તાવેજો બનાવી વેચાણ કરી દેવાના આક્ષેપમાં રાંદેર પોલીસે એક શખ્સ સામે છેતરપિંડી અને દસ્તાવેજી ગેરરીતિ અંગે ગુનો નોંધ્યો છે. આ સમગ્ર મામલામાં બેંકને રૂ.21.91 લાખનું નુકસાન થયાનું ફરિયાદમાં જણાવાયું છે.
બેંકનું લેણું બાકી હોવા છતાં મિલકતના વેચાણનો આક્ષેપ
રૂ.21,91,272ની લોનની રકમ વ્યાજ સહિત ભરપાઈ કર્યા વિના મિલકત વેચી દેવાના આક્ષેપમાં રાંદેર પોલીસે ગુનો નોંધ્યો.
સુરતના રાંદેર વિસ્તારમાં બેંક સાથે છેતરપિંડીનો એક ગંભીર મામલો સામે આવ્યો છે. પ્રાપ્ત વિગતો અનુસાર, સરફરાઝ દસ્તગીર ખાને તેની માતાના નામે રહેલી મિલકત સને 2014માં રાંદેરની સુટેક્ષ કો-ઓપરેટિવ બેંકમાં મોર્ગેજ (ગીરો) મૂકીને લોન લીધી હતી. સમય જતાં માતાનું અવસાન થતાં આરોપી સરફરાઝ ખાન આ મિલકતનો એકમાત્ર વારસદાર બન્યો હતો.
આરોપ છે કે મિલકત પર બેંકનું લેણું વ્યાજ સહિત બાકી હોવા છતાં, આરોપીએ બેંકની જાણ બહાર મિલકત અંગે ખોટો દસ્તાવેજ તૈયાર કરાવીને વેચાણ કરી દીધું હતું. ત્યારબાદ આ મિલકત ખરીદનાર સાદીકહુસેન અબ્દુસમદ કાનુગાએ પણ જ્યારે મિલકત અન્ય વ્યક્તિને વેચાણ કરી, ત્યારે મૂળ આરોપી સરફરાઝ ખાને તેમાં ઓળખાણ આપનાર તરીકે સહી કરી આપી હોવાનું સામે આવ્યું છે.
આ રીતે બેંકમાંથી લેવામાં આવેલી લોનની રૂ. 21,91,272ની રકમ વ્યાજ સહિત ભરપાઈ કર્યા વિના મિલકતના વ્યવહારો કરી બેંક સાથે ઠગાઈ કરવામાં આવી હોવાનો આક્ષેપ છે.
આ સમગ્ર મામલો સામે આવતા ગત 16 સપ્ટેમ્બર 2026ના રોજ રાંદેર પોલીસ સ્ટેશનમાં સત્તાવાર ફરિયાદ નોંધાઈ હતી. પોલીસે ભારતીય ન્યાય સંહિતા-2023ની કલમ 318(4), 336(2), 336(3) અને 338 મુજબ ગુનો નોંધીને કાયદેસરની તપાસ શરૂ કરી છે.
હાલ આ પ્રકરણમાં PSI બી.જી. વસાવા દ્વારા મિલકતના દસ્તાવેજો, બેંક લોન તથા સંબંધિત વ્યવહારોની ઊંડાણપૂર્વક તપાસ હાથ ધરવામાં આવી રહી છે.
