SURAT | AHMEDABAD | GANDHINAGAR
05/09/2026 Saturday
હિન્દી પત્રકારત્વના દ્વિશતાબ્દી વર્ષ નિમિત્તે VNSGUમાં વિશેષ સંગોષ્ઠી યોજાઈ
સુરત :- વર્તમાન ન્યૂઝ.કોમ
નગર રાજભાષા કાર્યાન્વયન સમિતિ (બેંક/વીમા), સુરત અને વીર નર્મદ દક્ષિણ ગુજરાત યુનિવર્સિટી, સુરતના પત્રકારત્વ વિભાગના સંયુક્ત ઉપક્રમે ‘હિન્દી પત્રકારિતા દ્વિશતાબ્દી વર્ષ’ નિમિત્તે ‘હિન્દી પત્રકારિતા–ગૌરવશાળી યાત્રા : વર્તમાન પડકારો તથા ભવિષ્ય’ વિષય પર વિશેષ સંગોષ્ઠીનું આયોજન કરવામાં આવ્યું હતું. આ સંગોષ્ઠી ગુરુવાર, 20 ઓગસ્ટ, 2026ના રોજ યુનિવર્સિટીના માનવ સંસાધન વિભાગના બીજા માળે આવેલા સેમિનાર હોલ ખાતે યોજાઈ હતી.
સંગોષ્ઠીના ઉદ્ઘાટન સત્રનો પ્રારંભ સવારે 10 વાગ્યે દીપપ્રાગટ્ય અને વિશ્વવિદ્યાલય ગાન સાથે થયો હતો. ભારતીય સ્ટેટ બેંકના મુખ્ય પ્રબંધક સંજીવ પાંડેએ સ્વાગત પ્રવચન આપ્યું હતું. ત્યારબાદ વીર નર્મદ દક્ષિણ ગુજરાત યુનિવર્સિટીના કુલસચિવ ડૉ. રમેશદાન ગઢવી, ભારત સરકારના રાજભાષા વિભાગના સહાયક નિર્દેશક પ્રમોદ સાંગોલે, ‘સંદેશ’ના મુખ્ય સંપાદક કૃષ્ણકાંત ઉનડકટ, નરાકાસ (બેંક/વીમા), સુરતના અધ્યક્ષ તથા ભારતીય સ્ટેટ બેંકના ઉપ મહાપ્રબંધક રાજેશ કુમાર તેમજ વીર નર્મદ દક્ષિણ ગુજરાત યુનિવર્સિટીના કુલપતિ ડૉ. કિશોરસિંહ ચાવડાએ સંબોધન કર્યું હતું. કાર્યક્રમ દરમિયાન ઉપસ્થિત ગણમાન્ય પત્રકારોનું સન્માન પણ કરવામાં આવ્યું હતું.
સંગોષ્ઠીનું દ્વિતીય સત્ર બપોરે 12 વાગ્યે યોજાયું હતું. સત્રનો પરિચય ભારતીય સ્ટેટ બેંકના મુખ્ય પ્રબંધક સંજીવ પાંડેએ આપ્યો હતો. આ સત્રમાં ‘ગુજરાત ગાર્ડિયન’ના તંત્રી મનોજ મિસ્ત્રી, ‘લોકતેજ’ના તંત્રી કુલદીપ સનાઢ્ય, ‘ધબકાર’ના સમાચાર તંત્રી નરેશ વારિયા અને ‘ગુજરાત મિત્ર’ના ધર્મેશભાઈ કુકડિયાએ હિન્દી પત્રકારત્વની ગૌરવશાળી યાત્રા, તેના વર્તમાન પડકારો અને ભાવિ સંભાવનાઓ અંગે પોતાના વિચારો રજૂ કર્યા હતા. સત્રના અધ્યક્ષ તરીકે એમ.ટી.બી. કોલેજ, સુરતના પ્રાધ્યાપક ભાવેશ જાધવે જવાબદારી સંભાળી હતી.
હિન્દી પત્રકારત્વના દ્વિશતાબ્દી વર્ષના પરિપ્રેક્ષ્યમાં યોજાયેલી આ વિશેષ સંગોષ્ઠીમાં પત્રકારત્વની ઐતિહાસિક વિકાસયાત્રા, બદલાતા મીડિયા પરિદૃશ્ય, વર્તમાન પડકારો તથા ભાવિ સંભાવનાઓ જેવા વિવિધ પાસાઓ પર વિચારવિમર્શ કરવામાં આવ્યો હતો. સંગોષ્ઠીએ પત્રકારો, શિક્ષણવિદો અને મીડિયા ક્ષેત્ર સાથે સંકળાયેલા તજજ્ઞોને હિન્દી પત્રકારત્વના ભૂતકાળ, વર્તમાન અને ભવિષ્ય અંગે ચર્ચા કરવા માટે એક મહત્વપૂર્ણ મંચ પૂરું પાડ્યું હતું.
• Share •